खाली पडलेला मोबाईल

-
खाली पडलेला मोबाईल
        
        गेल्या वीस वर्षांमध्ये प्रवास करताना आम्हांला तीन मोबाईल सापडलेत आणि हे तिन्ही मोबाईल सुखरूपपणे त्यांच्या मालकांपर्यंत पोहचते करताना जो काही त्रास झाला तो आम्हांलाच ठाऊक आहे. त्यातलाच हा एका मोबाईलचा अनुभव!
          दि. २५ सप्टेंबर २०१३ रोजी मी व माझे पती अशोक स्तंभाकडून एस. टी. कॉलनीकडे येत असताना दिवट्या बुधल्यांच्या सर्कलजवळ आमच्या गाडीच्या पुढेच रस्त्यावर एक मोबाईल खाली पडला. मोबाईल आमच्या गाडीच्या पुढे जाणाऱ्या रिक्शेतून पडला होता. मोबाईल आमच्या कारच्या चाकाखाली येणार तितक्यात  दिलिपने  मागच्या गाड्यांचा अंदाज घेत गाडी वळवली आणि गाडीखाली येणाऱ्या मोबाईलला मोठया शिताफीने वाचविले. मोबाईल तर सहीसलामत राहिला परंतु वाचवलेला मोबाईल त्याच्या मालकाकडे पोहचविण्याचे काम करणे भाग होते म्हणून आम्ही गाडी थांबवली आणि मागच्या गाडयांनाही ब्रेक दाबण्याशिवाय पर्याय नव्हता. गाडी थांबताच मी गाडीतून उतरले आणि रस्त्यावर पडलेला मोबाईल उचलला. मोबाईल उचलत असताना रस्त्यावरील प्रवाशांच्या नजरा खूप काही बोलून गेल्यात. कुणाला वाटले, मला फुकटचा मोबाईल हवा म्हणून मी तो घेण्यासाठी गाडीतून उतरले तर कुणाला वाटले, माझ्याऐवजी या बाईने मोबाईल बळकावला तर कुणाला करकचून ब्रेक दाबून गाडी थांबवावी लागली म्हणून  कपाळावर आठयांचे जाळे. अशा सर्व  प्रकारच्या नजरा झेलत मी मोबाईल उचलला.  मोबाईल तर उचलला परंतु त्यानंतर खरी कसरत होती ती म्हणजे ज्या व्यक्तीचा मोबाईल होता त्या व्यक्तीच्या हातात तो पोहचता करण्याची म्हणून आमच्या पुढे असणाऱ्या रिक्शेचा पाठलाग केला. रिक्शेचा पाठलाग करताना दिलिपने रिक्शा चालकाला हॉर्न वाजवून रिक्शा थांबविण्याचा इशारा केला परंतु रिक्शा चालक काही रिक्शा थांबवायला तयार नव्हता. दिलिपने  रिक्शेच्या पुढे गाडी नेऊन रिक्शा चालकाला रिक्शा थांबविण्यास सांगितले तरीदेखील तो रिक्शा थांबविण्यास तयार नव्हता. दिलिपने  शेवटी त्याच्या रिक्शेच्या पुढे गाडी आडवी करताच रिक्शा चालकाने रिक्शा नाईलाजास्तव थांबवली. रिक्शेत  डाव्या बाजूला  बसलेल्या  प्रवाशाला विचारले, तुझा मोबाईल कुठे आहे?  तेव्हा तो गोंधळला आणि स्वतःच्या जाकीटचे खिसे चाचपू लागला आणि खिसा रिकामा पाहून चांगलाच घाबरला. दिलिपने  त्याला मोबाईलच्या कंपनीचे नाव, रंग व कव्हरविषयी विचारून घेतले. अर्थात मोबाईल त्या व्यक्तीच्या खिशातून पडताना आम्ही प्रत्यक्ष डोळ्यांनी पाहिले होते म्हणून फार काही चौकशी करण्याची गरज भासली नाही. त्या व्यक्तीला मोबाईल परत केला असता त्याच्या चेहऱ्यावर जो आनंद होता, तो आनंद पाहून मघाशी माझ्याकडे जळजळीत नजरेने पाहणाऱ्या लोकांविषयी मला काहीच वाटले नाही.       
©ज्योत्स्ना पाटील 

Comments

Post a Comment

Lekhavishayi apale mat deu shakatat.

Popular posts from this blog

कौतुकभरली पुरणपोळी

-
सर्व रसिक वाचकांना होळीच्या हार्दिक शुभेच्छा ! होळी रे होळी  पुरणाची पोळी  अशी बोंब मारीत होळीभोवती उड्या मारणारे सगळे सवंगडी आजही प्रत्येकाला हमखास आठवतात आणि बालपणाच्या मधुर आठवणी घेऊन येणारी होळी जीवनाला एका  वेगळ्याच रंगात न्हाऊन काढीत असते. मला मात्र माझ्या सर्व बालमैत्रिणींची हमखास आठवण करून देणारी होळी पुरणपोळीचीही वेगवेगळी तऱ्हा आठवण्यास भाग पाडते नि पुन्हा बालमैत्रीण संगीताची प्रकर्षाने आठवण करून देत असते.    कौतुकभरली पुरणपोळी                    मराठी माणूस दुसऱ्याचे कौतुक करण्यास फारसा उत्सुक नसतो असा सर्वसाधारण गैरसमज आहे असे मला नेहमी वाटत असते कारण मला मात्र नेहमीच याच्या विपरीत अनुभव आलेले असल्यामुळे असावे. मला मात्र माझ्या प्रत्येक चांगल्या गोष्टीची दखल घेणारे नातेवाईक व मित्रमंडळी भेटल्यामुळेही असावे. असाच एक पदार्थ मला नेहमीच कौतुक भरली थाप मिळवून देतअसतो आणि तो पदार्थ म्हणजेच महाराष्ट्रीयन जेवणातील खरीखुरी राणी असणारी अशी तुमची माझी  आवडती ' पुरणपोळी ...
Read more

सिंहगड fort of sinhagad

-
    सिंहगड fort of sinhagad   कृषी पर्यटनाचे महत्त्व           पुण्याला गेल्यावर आम्ही पावसाळ्याचे दिवस असल्यामुळे सिंहगडला जाण्याचे ठरवले. दुपारी बारा वाजता आम्ही सिंहगडा च्या पायथ्याशी पोहचलोत आणि सिंहगड चढण्यास सुरवात केली. मधूनच येणारा पावसाचा शिडकावा आणि सिंहगड चढताना होणाऱ्या पर्यटकांच्या फजितीने सर्वांचीच हसून हसून पुरेवाट होत होती. सिंहगडा वरील हिरवाकंच कोट आणि गडाखालचा हिरवा गालिचा पाहून मन अगदी प्रफुल्लित होत होते त्यामुळे सिंहगड चढताना सर्वांनाच मजा येत होती.        सिंहगड fort of sinhagad           गप्पा करता करता सिंहगडा च्या मध्यावर येऊन पोहचलोत .  निम्मे अंतर  चढून  झाल्यावर  सगळेच  दमलेत  नि तहानेने घसाही सुकू लागला नि मग लिंबू सरबत पाहून सगळे ओरडलेत, 'लिंबू सरबत घेऊ या.' लिंबू सरबतची ऑर्डर देताच सरबत विक्रेते काका  लिंबू सरबत बनवायला लागले.  लिंबू सरबत बनवतांना त्या  काकांचे  हात मोठ्या सफाईने ...
Read more

पुस्तक वाचू या, आनंद लुटू या

-
                 वाचन एक चांगली सवय            आज २३ एप्रिल २०२०, जागतिक पुस्तक दिनानिमित्ताने मला लिहण्यासाठी प्रोत्साहन देणाऱ्या रसिक वाचकांचे आभार मानणे आवश्यक आहे. वेळोवेळी मला अभिप्राय देणाऱ्या नातलगांचे, मित्रमैत्रिणींचे आणि रसिक वाचकांचे आभार मी माझ्या आधीच्या पुस्तकात वाचकांच्या नावासह मानले आहेतच पण आज मात्र एकाच लेखावरील प्रतिक्रियेविषयी तेही अनोळखी वाचकांविषयी लिहून त्या सर्वांचे आभार पुस्तक दिनानिमित्त मानत आहे.             वाचन करणारे वाचक कमी झालेत, अशी ओरड सर्वत्र होत असते पण मला मात्र नेहमीच याच्या उलट अनुभव येत असतो. आज ललित वाचन करणारे वाचक कमी झाले असे दिग्गजांचे निरीक्षण सांगते परंतू मी जेव्हा जेव्हा ललित लेख लिहला तेव्हा तेव्हा मला वाचकांच्या प्रतिक्रिया सर्वात अधिक प्रमाणात आलेल्या आहेत.       दै. गांवकरी, दै. सकाळ, दै. लोकमत, महाराष्ट्र टाइम्स, दै. दिव्य मराठी या सर्व व्रुतपत्रात जेव्हा जेव्हा माझे लेख प्रकाशित झालेत तेव्हा तेव्हा अनेक व...
Read more